🌏කොන්ත්‍රාත්තුව🌏

(10 වන කොටස)

"අපි අද හවස ඇන්ජලාගෙ ගෙදර ගිහින් එමුද ස්ටිව්....මගේ හිතට හරි නෑ..... අන්තිමට මම ඇන්ජලාගෙ ගෙදර ගිය දවසේ, එයා අර කියපු කාරණාවට බය හිතිලා, මම හරියට එයාගෙන් සමුගන්නෙත් නැතුවම, කළබලේ ගෙදර ආවනේ......මට ඔයත් ඉන්න තැනක එයා එක්ක හරියට එයාගෙ, ඒ වැඩේ ගැන කතා කර ගන්න ඕනේ ....ඔයාම ඇන්ජලාට කියන්න ස්ටීව් අපි ඒ යෝජනාවට කැමති නෑ කියලා ....."

"ඔන්න චතුරි ...මම ඔයාට කිව්ව දේවල් මතකනේ....අපට කොච්චර අඩුපාඩු තිබුනත් මම ඕවට කැමති නෑ කියලා .... ....ඇන්ජලාට ලැජ්ජ නැද්ද මන්දා... ඔයාගෙන් ඒ වගෙ දෙයක් මේ කළබලේ කසාඳ බදින්න හදන කෙල්ලෙක්ගෙන් අහන්න.... ඕවා මේ ඒගොල්ලෝ හිතන තරම් සෙල්ලම් වැඩ නෙමේ, අපේ මමී බලාගෙන ඉන්නේ, අපි බැදපු ගමන් අපේ දරුවෙක් කවද්ද හදාගන්නෙ කියලා , ....මම ඔයා හින්දා අද ඒගොල්ලන්ගෙ ගෙදර යන්න එන්නම්.....මම ඔයාට අර කිව්ව විදිහට ඔයා එයාට කියන්න,... ඔයා ඒකට කැමති නෑ කියලා.....මම ඒ ගැන ටෙරික්ට කියන්නම්....

"ඒගොල්ලෝ ලොකු සල්ලියකුත් දෙන්න හදන්නේ...."

"සල්ලි කොච්චර දුන්නත් මම මේ වැඩ වලට කැමති නෑ චතුරි ....ආයෙත් ඒ ගැන කතා කරන්න එපා..."

"මට ඇන්ජලයි, ටෙරිකුයි පව් කියලා හිතෙනවා ස්ටීව්.... මම මේ කල්පනා කරන්නේ, කොහොමද මම ඇන්ජලාට මේකට උදව් කරන්නේ කියලා ....."

"ඔයාට ඕන දෙයක් ඔයා කරන්න, මම ඕවට නෑ....අද හවස ඕනනම් මම එහේ යන්න එන්නම් ඔයා නිසා....මම ටෙරික්ට කියනවා, ඇන්ජලා ඔයාගෙන් අහපු දේට මම කැමති නෑ කියලා ...."

"ඔයා මාත් එක්ක එහේ යන්න එන එක ලොකු දෙයක් ස්ටීව්.... තරහ ගන්නෙ නැතුව, ඒගොල්ලන්ට ඔයාගෙ අදහස පැහැදිලිව කියන්න ....වෙනසක් පෙන්නන්න එපා....."

හවස් වරුවේ මාත් ස්ටිව්වෝත් ඇන්ජලාගෙ ගෙදර බලා ගියේ අපේ විවාහය ගැනත්, ලංකාවට අපි යන්න ඉන්න ගමන ගැනත්, ඇන්ජලාගෙ දරුවා හදාගන්නා වැඩේ ගැනත් කතා කර ගන්නයි.....

ඇන්ජලා හිතන විදිහට මම ඒ දෙන්නගෙ දරුවෙක් මගේ ගර්භාශයේ හදලා දීලා, අපටත් දරුවෙක් හදාගන්න තරම් කාලයක් මටත් දැන් නැති තරම්ය......මමත් දැන් අවුරුදු තිහ පැන්න කෙනෙක් වෙලා..... මම වගේ විශ්වාස වන්ත කෙනෙක් හොයනවා කියලා ඇන්ජලා කිව්වේ ඔවුන්ගෙ දරුවා මා ලවා, මෙරටේම හදාගන්නට පහසු නිසා වන්නට ඇත....ඇය කෙතරම් අසරණ උනත්, ස්ටීව්ගෙ අකමැත්තෙන් මට ඇයට උදව් කල නොහැක. ඇයට උදව් කරන්න ගොස් මට, ස්ටීව් නැති කර ගන්නට බැරිය.... ඇන්ජලා මගෙන් ඒ ගැන කෙලින්ම ඇසුවේ, මගේ මුදල් අවශ්‍යතාවයන් ගැනත් ඇය හොදටම දන්නා නිසා වන්නට ඇති........ ඒ ගැන ස්ටිව්ටද තේරී ඇත. ස්ටීව් නම් ඒ ගැන සිටින්නේ අමනාපයකින්ය..... ඒ නිසයි ඔහු මට කිව්වේ, කොයිතරම් මුදල් අඩුපඩු තිබුනත්, ඔය වගේ දේවල් වලට ඔහු අකමැති බව....ඒ කෙසේ වෙතත්

ස්ටීව් ඉදිරියේම, ඇන්ජලාගෙන් ඒ යෝජනාව ගැන පැහැදිලිව නැවත කියවාගන්නා අවශ්‍ය තාවය මට නැවත ඇතිවි තිබේ.... .

මටත් ස්ටීව්ටත් ඇතිවි තිබෙන මුදල් අවශ්‍යතාවයන් වලට, ඇන්ජලාගෙ යෝජනාවට කැමති වුවහොත්, මටත් ස්ටිව්ටත් ඔවුන් දෙන මුදල් වලින්, මූළීක අත්තිකාරමක් ගෙවා, මාසිකව ගෙවාගෙන යන්නට, පොඩි එපාර්ට්මන්ට් එකක්, අපටම කියා ගන්නට හැකියාව ඇති බව මගේ හිතට නිතැතින්ම එයි........ඒ ගැන දිගට කල්පනා කරද්දී...., මම ඒ අනුන්ගේ මුදල් වලට තන්හාවෙන්, මාස දහයක පමණ කොන්ත්‍රාත්තුවකට බැදෙන්න තරම් මෝඩ කල්පනාවක ඉන්නා බවත් මට තේරේ..... අප දෙදෙනාට සුළුවෙන් හෝ ඇති මුදල් අවශ්‍යතාවයන් නැතිකරගැනීමට ආසාවෙන් මම, ලගදී විවාහවී දරුවෙක් හදන්න බලාපොරොත්තුවෙන් ඉන්නා මම, මගේ අනාගත සැමියා වන ස්ටීව්ගෙ අකමැත්තෙන් එවැනි දෙයක් කරන්න හිතන එකත් මෝඩ වැඩකී. ඒ ගැන සිතීමත් තේරුමක් නැති වැඩක්‍ ය......ඊටත් ඇන්ජලාගෙ වැඩේට මම කැමති උනත්, සිටීව් මේකට කැමති නොවන නිසා, මම සිටීව්ට ඒ වගේ දෙයකට පොළොඹොවා ගන්නට සිතීමත් තේරුමක් නැතිය.....

අපි දෙදෙනා ඇන්ජලාලගෙ ගෙදර යනවිට ,එදින ටෙරික්ද ගෙදර සිටිම ස්ටීව්ට සතුටට කාරනයක් විය.

" ඇන්ජලා ,ඔයා චතුරිට කරපු යෝජනාව ගැන විස්තර ටිකක් මට චතුරි කිව්වා තමයි ....ඒ උනාට චතුරි හරහා මේ වගේ දෙයක් කරනවට මම කැමති නෑ ඇන්ජලා ....විශේශයෙන් අපේ මමී ඕවා දැනගත්තොත් චතුරිව අපේ පවුලෙනුත් අයින් කරයි...... ඔයා හිතන තරම් ලේසි දෙයක් නෙමේ, මේ වැඩේ.....

ඇන්ජලාට, ස්ටීව් ඒ ගැන විස්තර කර දෙන්නට හදයි.

"අපි එහෙනම් මේකට වෙන කාවවත් හොයාගන්න බලමුද....?

"ඔව්...තව අය ඉන්න පුලුවන් ඔය වගේ දේකට සල්ලි වලට කැමති වෙන....

" ඔව්....ඒක ඇත්ත.....ඒ උනාට ඒ වගෙ දේකට, කැමති වෙන්නෙ නම් සල්ලි අවශ්‍ය තාවයක් තියෙන ගොඩක් දුප්පත් කෙනෙක් විතරයි.... "

ටෙරික්ද ස්ටීව්ගෙ කතාව අනුමත කලේය.

"ඒක තමයි මම මගෙේ ඩොක්ටර් එක්ක ඒ ගැන කතා කලා, එයා කියනවා මේ රටින් නම් ඒ වගේ කෙනෙක් හොයා ගන්න ලැබෙන එකක් නෑ කියලා ...."

"ඒ කියන්නෙ ඒ වගේ දෙයක් භාර ඇරගෙන කරන අය වෙන රටවල ඉන්නවද...මම මේ දේවල් ගැන් මුකුත් හරියට දන්නෙම නෑ ඇන්ජලා ...."

"ඉන්දියාව වගේ රටවල ඉන්නවලු ඒ වගේ කොන්ත්‍රාත්තු භාරගන්න අය ...සමහර විට ශ්‍රී ලංකාවෙත් ඉන්න පුලුවන් ...."

"ලංකාවේ....? අපේ රටේ....?

"ඔව්...නීත්‍යානුකූලව කෙරෙන දේවල් නෙමේ කියලා මම නම් හිතන්නේ...., විශ්වාසය උඩ සිද්ද වෙන දේවල් වෙන්න ඇති......හරියට හොයලා බලන්න ඕනේ....."

"චතුරි ඔයාට බැරිද ඒ ගැන ලංකාවේ කාගෙන් හරි අහල බලලා මට කියන්න ....නිකන් නෙමේනේ, ඔක්කොම යන වියදම් වලටත් එක්ක මම ලක්ශ සීයක් දෙන්න කැමතියි..... ඒ වගේ කවුරු හරි මගෙයි, ටෙරික්ගෙයි දරුවා මාස නමයක් බඩේ තියාගෙන ඉදලා හදලා අපට දෙන්න කැමති නම් අපේ හිතේ තියෙන මේ දරුවෙකුගේ ආසාව ඉශ්ට කරගන්න පුලුවන් වෙනවනේ ....."

"ලක්ශ සීයක් කියන්නේ ලොකු ගානක් ....? එච්චර ලොකු ගානක්....දෙනව නම් කවුරු හරි කැමති වෙන්නත් පුලුවන් ....."

"මම ලංකාවේ කාට හරි කියලා, මේ වැඩේට කෙනෙක් ඔය දෙන්නට හොයලා දෙන්න බලනම්...."

"අනේ චතුරි ලොකු උදව්වක්..... "

"මගෙ යාලු ඩොක්ටර් කෙනෙක් ලංකාවේ ඉන්නවා , මම කෝකටත් කියලා එදා ඔයා ඒක කිව්වට පස්සෙ එයත් එක්ක මේ ගැන කතා කරලා බැලුවා, එයා ඒ ගැන හරියට විස්තර හොයලා බලලා මට කියන්නම් කියලා තියෙන්නේ......."

"අනේ එහෙම කරන්න පුලුවන් නම් ලොකු උදව්වක් .....අපි ලංකාවට යන්න ඉස්සර මේ ගැන හොයලා බලලා කියන්නකෝ චතුරි ..?

" එහෙනම් මම අදම මේ ගැන මගේ අර අදුනන ලංකාවේ ඉන්න ඩොක්ටර් අක්කාගෙන් තව විස්තර අහලා බලන්නම්.....

"ඒකකොට තරුණ ගෑනු කෙනෙක් හොයාගන්න වැඩේ ගැනත් තව කාගෙන් හරි අහලා බලන්න ඕනේ නේද?...."

"ඔව් ඒ වැඩේත් මම බලන්නම්.....දැන් අපේ වෙඩින් එකත් ලඟයි...මෙහෙ වෙඩින් එක ඉවර උන හැටියේ ලංකාවට යන්න ලෑස්ති වෙන්නත් ඕනේ...මෙහෙ වගේ නෙමේ, ලංකාවේ අපේ හෝම් කමින් එක ලොකුවට ගන්න අපේ අම්මලා ලෑස්ති කරනවා කියලා තියෙන්නේ..... මේ කළබලේම මම ඔයාගෙ වැඩේ ගැනත් බලන්නම් "

"ඔය දෙන්නා අද රෑට මෙහෙන් ඩිනර් ඇරන් යන්න චතුරි ...."

"ඔව්...කාලෙකින් නේ අපි මුණ ගැසුනෙත්....ඒක හොදයි ..."

"ආ...එහෙනම් චතුරි අපි මොනව හරි රෑට කන්න හදමු....මේ දෙන්නට ඩ්‍රින්ක් එකකුත් ගන්න පුලුවන් අද රෑ වෙනකම්......"

එදින ටෙරික්, ස්ට්ව් , ඇන්ජලා හා මම ගොඩක් රෑ වෙනකම්, අපේ වෙඩින් එකේ වැඩේ, අපි හතර දෙනා ලංකාවට යන වැඩේ, ඇන්ජලාගෙ වැඩේට ගෑනු කෙනෙක් හොයා ගන්නා වැඩේ ගැන ගොඩක් දේවල් කතා කෙරුවෙමු .

ඒ අතර මමත් ඇන්ජලාත් ඔවුන්ගේ ගෙදරදීම,

මගේ ලංකාවේ සිටින හොද යාළුවෙක්, ලොයර් කෙනෙක් වන ඉන්දුට කතා කර මෙයට පිලියමක්, අදහසක් ඇගෙන් ගන්නටද කතා කෙරුවෙමු .

"මේක හිතන තරම් ලේසි කටයුත්තක් නෙමේ චතුරි , සල්ලි වියදම් කරන්න පුලුවන් උනාට්, සල්ලි අවශ්‍ය තාවයන් තියෙන අය හිටියට, විශ්වාස වන්ත, හොද නිරෝගි තරුණ කෙනෙක් හොයා ගන්නත් ඕනේ... ....ඒ වගේම මේ දේ කරන්න ඉස්සර දෙගොල්ලොම ලෝයර් කෙනෙක් ලඟ සයින් කරලා , ළමයා හම්බුනාම දරුවා ඇන්ජලාට බාර දෙන බවටත් පොරොන්දු කරවා ගන්න ඕනේ....ඒ වගේම සල්ලි වලට මේ දේ කරනවා නම්, සල්ලි ඒ ගෑනු කෙනාට ලැබෙන විදිහත් , පිලිවෙලට ලෝයර් කෙනෙක් ලඟ ලියුමක් හදලා සයින් කරලම කරන්න ඕනේ.....ඒ උනාට කොච්චර සල්ලි ලැබුනත්, කාසාද බදින වයසේ, තරුණ කෙල්ලෙක් මේ වගේ දෙයකට කැමති වෙයි කියලා හිතන්නත් අමාරුයි ...කසාඳ නොබැදපු කෙනෙක්, අනුන්ගේ ළමෙක් තමන්ගෙ බඩේ හදන්න කවුද කැමති වෙන්නේ...."

"ඒක ඇත්ත...මම අදුනන අය්යා කෙනෙක් ඉන්නවා, කටුනායක ගාමන්ට් ෆැක්ටෙරි එකක වැඩ කරන, මම එයාගෙන් මේ වැඩේට දුප්පත් ගෑනු ළමයෙක්, ඒ කියන්නේ සල්ලි අවශ්‍ය තාවය තියෙන කෙනෙක් හොයා ගන්න පුළුවන්ද කියලා අහලා බලන්නම්..."

"අනේ ලොකු උදව්වක් චතුරි, අපට ලංකාවට යන්න ඉස්සර මේ දේවල් කතා කරලා දැනගන්න පුලුවන් නම් අපට ඒ වෙනුවෙන් සල්ලිත් ලංකාවට අරින්න ලෑස්ති කරලම යන්න පුලුවන්නේ ..."

"ඔව් මම වේලාසන ඒ ගැන කතා කරලා හොයලා බල්න්නම්..."

"කෝකටත් ඇන්ජලා ඔය දෙන්නා අපේ වෙඩින් එකට ලංකාවට යන්නනේ ඉන්නේ....ඒ යනකොටම මේක ලෑස්ති කරගෙන යන්න පුලුවන් නම් හොදයි තමයි. එහෙ යන්න ඉස්සර අපට මොනවද කරන්න පුලුවන් කියලා මම අද හෙටම කතා කරලා බලන්නම් ඇන්ජලා ...."

"ඒ වගේම චතුරි , ලංකාවේ තියෙන, ඔය IVF ක්‍රමයට දරුවන් හදන්න පුලුවන් පහසුකම් තියෙන හොස්පිටල් එකක් හොයා ගන්නත් ඕනේ, ඒවා කරන දොස්තර කෙනෙක් හොයලා බලන්නත් ඕනේ....."

"ඔව් ඇත්ත, ලංකාවේ ඒ වගේ ගැබ් ගැන්වීම් කරන ක්‍රම තියෙනවද ඒවා කරන්නේ කොහොමද , ඒවට යන වියදම, හැම දෙයක්ම හොයලා බලලා ඉවර වෙලා තමයි අර ගෑනු ළමයා හොයාගන්න ඕනේ...."

"අනිවාර්‍ය්යෙන්ම කසාද නොබැදපු කෙනෙක් වෙන්නත් ඕනේ චතුරි මොකද අපේ දරුවා හදලා ඉවර වෙනකම් ඒ ගෑනු කෙනා අපි වෙනුවෙන්ම මේ වැඩේට ඇරිලා ඉන්න ඕනේ....කසාද බැදපු අය උනාම ප්‍රශ්න එන නිසා...."

" මම ඒවා අර ලංකාවේ ගාමන්ට් එකේ වැඩ කරන අය්යත් එක්ක කතා කරලා බලලා ඔයාට කියන්නම් ඇන්ජලා ....."

" ඔව් චතුරි , ඒ දේවල් ඔක්කොම කතා කරගෙන බලලා, අනෙක් වැඩ කටයුතුත් ලෑස්ති කරගෙනම අපි ලංකාවට ගියානම් තමයි හොද කියලා මටත් හිතෙනවා....."

"ඔව් එහෙනම් මම ලංකාවේ මේ දෙවල් වලට හොද හොස්පිටල් එකක්, හොද ඩොක්ටර් කෙනෙක් ගැන එහෙමත් හොයලා බලලා, එයා එක්ක මේ ගැන කතා කරලා බලලම, ඔයාට කියන්නම් .... "

"ගොඩක් තැන්ක්ස් චතුරි ...."

"මම ඔයා වෙනුවෙන් කරන්න පුලුවන් දෙයක් තියෙනවානම් ඒක කරලා දෙන්න ආසාවෙන් ඉන්නෙ, ඔයා මගේ හොදම යාළුවා නිසා...."

" තැන්ක්ස් චතුරි , මම දන්නවා, ඔයාට පුලුවන් මේකට උදව් කරන්න .....පුලුවන් නම් අද හෙටම ලංකාවේ ඩොක්ටර් හොයාගෙන මටත් කියන්න, මටත් මේ ගැන එයත් එක්ක කතා කරලා බලන්න ආසයි........"

"මම ඔයාට ඒ විස්තර හොයලම කියන්නම් ඇන්ජලා ..."

-සිකුරාදාට අපි නැවත හමුවෙමු-

*ප්‍රිසිලා ගොඩහේවා*